Að minnsta kosti 26 óbreyttir borgarar létust í loftárásum á suðurhluta borgarinnar Daraa í Sýrlandi fyrr í dag. Uppreisnarhópar hafa verið við völd í borginni í nokkur ár.
Yfirmaður mannúðarsamtakanna Syrian Observatory, Rami Abdel Rahman, segir að ellefu börn séu á meðal hinna látnu. Sýrlenski stjórnarherinn stendur fyrir loftárásunum í félagi við bandamenn sína Rússa. Loftárásirnar hafa staðið yfir með hléum í nokkrar vikur.
Uppreisnin gegn Bashar al-Assad forseta á rætur sínar að rekja til Daraa árið 2011. Síðan stríðið braust út hafa yfir 350 þúsund Sýrlendingar fallið og milljónir þurft að yfirgefa heimili sín.