Mike Pompeo, utanríkisráðherra Bandaríkjanna, hvatti í dag ríki Sameinuðu þjóðanna til að halda stífum viðskiptaþvingunum gegn Norður-Kóreu til streitu til að þrýst verði á N-Kóreu að hætta allri kjarnorkuframleiðslu og kjarnorkutilraunum.
Pompeo kom fyrir Öryggisráð Sameinuðu þjóðanna í dag þar sem hann hvatti til áframhaldandi refsiaðgerða. Rússar og Kínverjar telja að tími sé kominn til að draga úr aðgerðunum.
Bandaríski utanríkisráðherrann fundaði með Kim Yong-chol, embættismanni Norður-Kóreustjórnar, í byrjun júlí. Þar var kjarnorkusamkomulag Norður-Kóreu og Bandaríkjanna til umræðu og sagði Pompeo að árangur hefði náðst. Það eitt og sér nægi hins vegar ekki til að slaka á viðskiptaþvingunum.