Rændu 36 konum og börnum í Sweida

Liðsmaður sýrlenska stjórnarhersins virðir fyrir sér skemmdir eftir sjálfsvígsárás í …
Liðsmaður sýrlenska stjórnarhersins virðir fyrir sér skemmdir eftir sjálfsvígsárás í Sweida sl. miðvikudag. AFP

Vígasamtökin Ríki íslams rændu tugum drúsa-kvenna og barna er þau réðust á þorp þeirra í Sweida í Suðaustur-Sýrlandi í síðustu viku.

AFP hefur eftir sýrlensku mannréttindavaktinni Syrian Observatory for Human Rights að 250 manns hafi verið drepnir sl. miðvikudag í röð sjálfsvígsárása og skotárásum í samnefndri höfuðborg héraðsins.

„Að minnsta kosti 36 drúsa-konum og börnum var rænt í árásinni,“ segir tilkynningu frá mannréttindavaktinni og sýrlenski fréttamiðillinn Sweida 24 segir 20 konum og 16 börnum hafa verið rænt.

„Fjórum kvennanna tókst að flýja og tvær til viðbótar eru látnar,“ segir Rami Abdel Rahmann, yfirmaður mannréttindavaktarinnar.

Ríki íslams hefur ekki lýst yfir ábyrgð á mannránum og engar frekari lýsingar á þeim er að finna á þeim miðlum sem samtökin nota.

Ríki íslams lýsti yfir sjálfstæðu ríki á landsvæðum í Sýrlandi og Írak árið 2014, en samtökin hafa misst stóran hluta þess svæðis í átökum undanfarinna missera. Samtökin hafa þó enn á valdi sínu lítil einangruð svæði á hrjóstrugri svæðum, m.a. í norðausturhluta Sweida og nágrannahéraðinu Daraa.

Sveitir sýrlenska stjórnarhersins hafa, með aðstoð Rússa, staðið fyrir árásum á svæðin í Daraa í rúma viku.

Sweida, sem er á valdi stjórnarhersins og þar sem íbúar tilheyra flestir minnihlutahópi drúsa, hefur sloppið að mestu við átök í Sýrlandsstríðinu. Árásirnar í síðustu viku eru þær mannskæðustu í héraðinu frá því Sýrlandsstríðið hófst.

mbl.is
Fleira áhugavert
Fleira áhugavert