Gríðarlegir þurrkar eru um allt fjölmennasta fylki Ástralíu, New South Wales. Mjög þurrt hefur verið á svæðinu í vetur og eru þurrkarnir í austanveðri Ástralíu þeir mestu í manna minnum.
Um fjórðungur allra landbúnaðarafurða Ástralíu eiga uppruna sinn í fylkinu. Í dag hefur „100% þurrki“ opinberlega verið lýst yfir. Verið er að skipuleggja neyðaraðstoð til íbúa.
„Allir íbúar fylkisins vonast eftir að fá rigningu fyrir bændurna okkar,“ segir einn af ráðherrum fylkisins, Niall Blair, í samtali við BBC.
Haustið í suðurhluta Ástralíu var það næstþurrasta frá upphafi mælinga. Úrkoma var 57 mm undir meðallagi. Í júlí mældist innan við 10 mm úrkoma á svæðum í New South Wales og á næstu mánuðum er enn spáð þurrviðri.
Bændur hafa lýst horfelli á skepnum. Uppskeran hefur brugðist og vatn er af skornum skammti. „Þetta er eins og að vera í fangelsi alla daga,“ segir bóndinn Ashley Gamble. Bændur hafa orðið að selja frá sér skepnur þar sem þeir eiga ekkert til að gefa þeim að éta.