Þingmenn í Argentínu hafa hafnað frumvarpi sem heimilað hefði fóstureyðingar á fyrstu fjórtán vikum meðgöngu. Atkvæðagreiðsla um málið fór fram í öldungadeild þingsins í nótt og greiddu 38 þingmenn atkvæði gegn því en 31 með. Niðurstaðan þýðir að málið verður ekki tekið fyrir að nýju fyrr en á næsta ári. Til málamiðlunar hafði verið lagt til að fóstureyðingar yrðu bannaðar eftir tólftu viku meðgöngu en sú tillaga var felld.
Fóstureyðingar eru aðeins leyfðar í Argentínu ef þungunin er afleiðing nauðgunar, ef lífi móður er ógnað og ef fóstrið er með fötlun. Þannig er því einnig farið í mörgum öðrum löndum Suður-Ameríku.
Frumvarpið hafði í júní verið samþykkt með naumum meirihluta.
Stuðningsmenn frumvarpsins sem og andstæðingar þess hópuðust saman fyrir utan þinghúsið í nótt að íslenskum tíma á meðan atkvæðagreiðslan fór fram.
„Það sem þessi atkvæðagreiðsla sýnir er að Argentína er enn land sem hefur fjölskyldugildi í heiðri,“ segir einn andstæðingur frumvarpsins í samtali við Reuters-fréttastofuna.
Stuðningsmenn frumvarpsins, sem hafa staðið fyrir fjölmennum stuðningsfundum um allt landið síðustu vikur, voru gríðarlega vonsviknir með niðurstöðuna í öldungadeildinni. Þeir hafa í áraraðir barist fyrir rýmkun á fóstureyðingalöggjöfinni og fengu byr undir báða vængi nýverið er hinn íhaldssami forseti landsins, Mauricio Macri, bað þingheim að taka málið til skoðunar.
Mannréttindasamtök telja að um 500 þúsund ólöglegar fóstureyðingar séu framkvæmdar í Argentínu ár hvert. Um 100 konur látist árlega af þeim sökum.