48 létust og 67 særðust í sjálfsvígsárás í Kabúl, höfuðborg Afganistan, í dag. Árásin var gerð á menntasetur í vesturhluta borgarinnar. Árásarmaðurinn gekk inn í kennslustund með sprengjubelti um sig miðjan þar sem hann sprengdi sig í loft upp.
Flestir hinna látnu eru táningar sem voru að undirbúa sig fyrir inngöngupróf í háskólanum í Kabúl. Talibanar sverja af sér árásina og talið er að hryðjuverkasamtökin Ríki íslams beri ábyrgð á árásinni.
Þá brutust út átök í Baghlan-héraði í norðurhluta landsins í dag þar sem níu lögreglumenn og 35 hermenn létu lífið.