Rússar hafa greint frá umfangi hernaðaraðgerða sinna í stríðinu í Sýrlandi. Í myndskeiði frá varnarmálaráðuneyti landsins kemur fram að meira en 63.000 Rússar hafi tekið þátt í bardögum síðan í september 2015.
Á sama tíma hefur rússneski flugherinn farið í 39.000 árásarferðir þar sem hann hefur eyðilagt 121.466 skotmörk uppreisnarmanna. Auk þess hefur hann drepið meira en 86.000 vígamenn.
Ekki var minnst á mannfall rússneskra hermanna eða óbreyttra borgara.
Sýrlenska mannréttindavaktin Syrian Observatory for Human Rights segir að minnsta kosti 7.928 óbreyttir borgarar og 10.069 hermenn hafi verið drepnir í flugárásum Rússa.
Rússneskt herlið hefur átt stóran þátt í því að styrkja stöðu hersveita Bashar al-Assad, forseta Sýrlands, undanfarin þrjú ár í stríðinu í Sýrlandi.