Lögreglan í Malasíu leitar tveggja kvenna frá Indónesíu en þær eiga að bera vitni í réttarhöldum yfir konunum sem sakaðar eru um að hafa myrt hálfbróður Kim Jong-un, leiðtoga Norður-Kóreu.
Lögregla leitar aðstoðar almennings í Malasíu við að hafa uppi á Raisa Rinda Salma og Dessy Meyrisinta en þær hafa ekki fundist þar sem þær eru skráðar til heimilis.
Siti Aisyah og Doan Thi Huong eru sagðar hafa makað taugaeitrinu VX framan í Kim Jong-nam, hálfbróður Kim Jong-un. Atvikið átti sér stað á flugvellinum í Kuala Lumpur í Malasíu í febrúar í fyrra.
Lögmenn Aisyah og Huong halda því fram að konurnar hafi verið gabbaðar af yfirvöldum í Norður-Kóreu. Fjórir norðurkóreskir útsendarar hafa einnig verið ákærðir vegna málsins.
Asria, faðir Aisyah, biðlaði til ráðamanna í heimalandi sínu Indónesíu að koma með einhverjum hætti að björgun dóttur hans. „Hún var göbbuð. Ég hef talað við hana og hún veit ekki hvað gerðist,“ sagði hann.