Luiz Inácio Lula da Silva, fyrrverandi forseti Brasilíu, má ekki bjóða sig fram til forseta landsins í október. Meirihluti dómara við æðsta dómstól landsins komst að þeirri niðurstöðu seint í gærkvöldi en ástæðan er fangelsisvist vegna spillingar.
Lula, sem er 72 ára gamall, var dæmdur í tólf ára fangelsi í júlí í fyrra en hann var forseti á árunum 2003 til 2010 og naut mikilla vinsælda. Verkamannaflokkurinn mun gera sitt til að Lula fái að bjóða sig fram en samkvæmt erlendum miðlum verður dómnum áfrýjað.
Það tók margar klukkustundir fyrir fjóra dómara af sjö að komast að þeirri niðurstöðu að Lula sé óheimilt að bjóða sig fram í október.
Fyrrverandi forsetinn hefur ávallt haldið fram sakleysi sínu og segir að pólitískir andstæðingar vilji hann bak við lás og slá.
Lula er stofnandi Verkamannaflokksins en á hægri væng stjórnmálanna er litið á hann sem holdgerving spillingar sem grasseri meðal pólitískrar yfirstéttar landsins.
Vinstrimenn segja hins vegar að Lula hafi staðið sig mjög vel í velferðarmálum á valdatíð sinni og komið tugum milljóna manna úr fátækt. Spillingarmálið er í þeirra huga blekkingarleikur sem er til þess fallinn að firra spillta stjórnmálamenn á hægri vængnum ábyrgð, m.a. núverandi forseta, Michel Temer.