Hækkun eftirlaunaaldurs mótmælt

Mótmælendur söfnuðust saman í nokkrum borgum í Rússlandi í dag til að mótmæla fyrirætlunum stjórnvalda um að hækka eftirlaunaaldur um nokkur ár.

Samkvæmt frétt BBC mótmæltu um tíu þúsund manns í Moskvu. Skipulag mótmælanna var í höndum Kommúnistaflokksins.

Vla­dimir Pútín, for­seti Rúss­lands, ákvað fyrr í vikunni að milda þær breyt­ing­ar sem fyrirhugaðar eru á eft­ir­launa­kerfi lands­ins. Pútín leggur til að eft­ir­launa­ald­ur rík­is­starfs­manna verði hækkaður um fimm ár hjá kon­um, eða í 60 ár, í stað fyrri til­lögu um að hækka hann í 63 ár. Hann hélt sig við upp­haf­lega til­lögu sína um að eft­ir­launa­ald­ur karla verði hækkaður um fimm ár, eða í 65 ár.

Frétt af mbl.is

Breytingar á eftirlaunakerfi mildaðar

Með breytingunni er hann sagður bregðast við harðri gagn­rýni vegna áformanna og dvín­andi vin­sæld­um í sinn garð. Þrátt fyrir það var mótmælt í dag.

Stéttarfélög í landinu hafa varað við því að fjöldi fólks muni ekki lifa nógu lengi til að komast á eftirlaun. Meðalævilengd rússneskra karla er 66 ár en 77 ár hjá rússneskum konum, samkvæmt upplýsingum frá Alþjóðaheilbrigðismálastofnuninni (WHO).

Neðri deild rúss­neska þings­ins samþykkti um­bæt­urn­ar í síðasta mánuði, við mikla óánægju al­menn­ings. Tug­ir þúsunda hafa farið í mót­mæla­göng­ur víða um Rúss­land und­an­farn­ar vik­ur og ekkert lát virðist ætla að verða á þeim.

• Blogga um frétt