Lögreglan í smábænum Kirchschlag í norðurhluta Austurríkis klórar sér nú í hausnum yfir kengúru sem virðist hafast við í nágrenni bæjarins. Fjölmargar tilkynningar hafa borist um kengúruna ásamt myndum og myndskeiðum þannig lögreglan er nokkuð viss um að hér sé um kengúru að ræða en ekki annað dýr. Sem er ansi sérkennilegt því heimkynni kengúrunnar eru í Ástralíu, í um 14 þúsund kílómetra fjarlægð frá Austurríki. BBC greinir frá.

Búið er að hafa samband við alla dýragarða á stóru svæði í kring en enginn kannast við að sakna kengúru. Lögreglan vonast þó til að eigandinn gefi sig fram á endanum. Þangað til verður reynt að fanga kengúruna líkt og um strokuhund sé að ræða.

Ruth Kastner er ein þeirra sem hafa séð kengúruna hoppandi um á víðavangi, en hún og eiginmaður hennar trúðu ekki sínum eigin augum. „Við hugsuðum með okkur: „Er þetta alvörukengúra?“ en það fór ekki á milli mála þegar hún hoppaði inn í skóginn.“

Ekki hefur verið hægt að staðfesta um hvaða tegund er að ræða en Daniela Artmann, dýrahirðir í Schmiding-dýragarðinum, telur hana vera af tegundinni benett sem þolir ágætlega kaldara loftslag.

Þrátt fyrir að kengúrur séu sjaldséðir gestir í Austurríki og þetta tiltekna pokadýr hafi valdið miklum heilabrotum er þetta ekki í fyrsta skipti sem kengúra dúkkar þar upp. Árið 2015 bárust margar tilkynningar um kengúru en í ljós kom að um gæludýr var að ræða sem hafði náð að strjúka frá eiganda sínum í Þýskalandi.

Tengdar fréttir

Krúttleg dýr

Úr fatahönnun í nám í dýrahjúkrun

• Íslenskir hestar og hundar frá Gasa á JFK-flugvelli
• Blóðgjöfin sem bjargaði hundslífi
• Hundur gaf hundi blóð
• Lúrði á staurnum og opnaði augun annað slagið

» Fleiri tengdar fréttir

• Blogga um frétt