Erlent | mbl | 6.9.2018 | 9:04 | Uppfært 10:54

Kim hefur ekki misst trúna á Trump

Kim Jong-un og Donald Trump takast í hendur á leiðtogafundi sínum í Singapúr. Hann segist enn hafa trú á Trump. AFP

Kim Jong-un, leiðtogi Norður-Kóreu, segir trú sína á Donald Trumpp Bandaríkjaforseta vera „óbreytta“ og er enn áfram um að ná fram afvopnavæðingu kjarnavopna á Kóreuskaga á fyrsta kjörtímabili forsetans.

Þetta hefur BBC eftir suðurkóreskum embættismönnum. Kim á að hafa látið þessi orð falla við sendifulltrúa Suður-Kóreu, sem voru staddir í Norður-Kóreu til að skipuleggja fund Kims og Moons Jae-ins forseta Suður-Kóreu síðar í mánuðinum.

Samskipti Norður-Kóreu og Bandaríkjanna hafa stirðnað nokkuð á ný eftir sögulegan leiðtogafund þeirra Trumps og Kims í Singapúr í júní. Vara þannig margir sérfræðingar við að Norður-Kórea hafi ekki gert mikið til að hefja afvopnun kjarnavopna líkt og Kim hafi lofað, en engin tímalína fyrir afvopnun var lögð fram á fundi þeirra Trumps og Kims.

Verði af heimsókn Moons til Norður-Kóreu er það í fyrsta skipti frá skiptingu Kóreuskagans sem leiðtogi Suður-Kóreu heimsækir höfuðborg Norður-Kóreu. Á fundinum, sem stendur yfir dagana 18.-20. september, mun Moon ræða hagkvæmar leiðir til að losa Kóreuskagann við kjarnavopn.

Á fundi með suðurkóresku sendifulltrúunum sagði Kim það staðfastan vilja sinn að vinna með Suður-Kóreu að því að ná fram varanlegum frið.

„Kim leiðtogi ... lýsti yfir vonbrigðum með þær efasemdir sem sumir í alþjóðasamfélaginu hafa látið í ljós varðandi fyrirætlanir hans,“ sagði Chung Eui-yong þjóðaröryggisráðgjafi Suður-Kóreu.

Norður-Kórea vinni að forgangsaðgerðum varðandi afvopnavæðingu kjarnavopna og Kim hafi sagt að hann myndi meta það ef þeim velviljuðu aðgerðum væri mætt með góðri trú.