Hafa þrengt lista grunaðra niður í 12

Donald Trump Bandaríkjaforseti á fundi með stuðningsmönnum sínum í Montana ...
Donald Trump Bandaríkjaforseti á fundi með stuðningsmönnum sínum í Montana í gær. AFP

Það var ekki ég sagði varaforsetinn, ekki ég sagði utanríkisráðherrann, né heldur var það ég sagði dómsmálaráðherrann. New York Times segir uppákomuna í tengslum við afneitun svo gott sem allra háttsettra embættismanna í Hvíta húsinu á að þeir séu óþekkti embættismaðurinn vera án fordæmis.

Óþekkta embættismannsins er nú leitað logandi ljósi innan Hvíta hússins. Í grein hans sem birt­ist í banda­ríska dag­blaðinu New York Times í gær er Don­ald Trump Banda­ríkja­for­seti harðlega gagn­rýnd­ur og því haldið fram að emb­ætt­is­menn rík­is­stjórn­ar hans vinni að því að grafa und­an hon­um vegna ótta við það hversu „óút­reikn­an­leg­ur“ og „siðlaus“ hann sé.

Segir New York Times repúblikanann og öldungadeildarþingmanninn Rand Paul, einn stuðningsmanna Trumps, hafa mælt með því að forsetinn léti starfsfólk Hvíta hússins gangast undir lygapróf og er sú tillaga sögð hafa verið rædd meðal ráðgjafa forsetans. Þá var einnig stungið upp á því að Trump léti háttsetta embættismenn sverja eið.

Óstaðfestar heimildir blaðsins segja Hvíta húsið nú vera búið að þrengja lista grunaðra niður í tólf sem mögulega geti verið höfundar greinarinnar. Þá eru yfirmenn í Hvíta húsinu sagðir hafa hringt í ýmis ráðuneyti og stofnanir til að kanna hvort einhverjir ráðherrar stjórnarinnar gætu verið sekir og hefur það leitt til fjölda yfirlýsinga embættismanna og ráðherra um að þeir séu ekki óþekkti embættismaðurinn.

CNN hefur birt lista yfir mögulega greinarhöfunda og til þessa hafa a.m.k. 25 embættismenn neitað því að þeir séu óþekkti embættismaðurinn.

Meðal þeirra sem neitað hafa eru Mike Pence varaforseti, Mike Pompeo utanríkisráðherra, varnarmálaráðherrann Jim Mattis, fjármálaráðherrann Steven Mnuchin, dómsmálaráðherrann Jeff Sessions, Kirstjen M. Nielsen, ráðherra heimavarnarmála, þjóðaröryggisráðgjafinn John R. Bolton og Dan Coats, yfirmaður bandarísku leyniþjónustustofnananna.

„Hver sá sem skrifar nafnlaust bréf sem atar forsetann, sem stjórnar þjóðinni af einstakri hæfni, ætti ekki að vera að vinna fyrir þessa stjórn,“ sagði Pence og hvatti viðkomandi til að segja af sér.

Þá hvatti Sarah Huckabee Sanders, blaðafulltrúi Hvíta hússins, þá sem vildu vita deili á „nafnlausu gungunni“ að hringja í New York Times.

mbl.is
Skrifstofuhúsæði Fiskislóð
Til leigu 55m2 2 samliggjandi skrifstofuherbergi við Fiskislóð, innifalið í leig...
Hjálp við að hætta að reykja
Hjálp óskast við að hætta að reykja....
Fasteignir
Ertu að leita að fasteignasala ? Frítt söluverðmat, vertu í sambandi sími ...
veggklukka antik veggklukka
er með flotta veggklukku með mjúkum og þægilegum slætti á12,000 kr sími 869-279...