Moonves víkur í kjölfar ásakana

Les Moonves hafnar alfarið ásökunum sem hann segir að séu ...
Les Moonves hafnar alfarið ásökunum sem hann segir að séu ógeðfelldar og sturlaðar. AFP

Yfirmaður bandaríska fjölmiðlafyrirtækisins CBS í Bandaríkjunum, Les Moonves, mun víkja úr starfi að því er fram kemur í bandarískum fjölmiðlum. Þetta gerist í kjölfar ásakana kvenna um að hann hafi áreitt þær kynferðislega eða beitt þær kynferðisofbeldi.

Fram kemur að stjórn fyrirtækisins hafi komist að samkomulagi við Moonves um starfslok. 

Nýverið sökuðu sex konur hann um kynferðislega áreitni og kynferðisofbeldi í tímaritinu New Yorker. Þær bætast við sex aðrar konur sem stigu fram með svipaðar ásakanir gegn honum í sama tímariti í júlí, sem leiddi til þess að CBS hóf rannsókn. Þetta kemur fram á vef BBC.

Moonves, sem er 68 ára gamall, vísar þessu alfarið á bug. Hann segir að nýjustu ásakanirnar séu ógeðfelldar.

Ásakanirnar birtast í grein eftir Ronan Farrow, sem skrifaði einnig greinina sem birtist í júlí. Hann hlaut í ár Pulitzer-verðlaunin fyrir umfjöllun um ásakanir gagnvart kvikmyndaframleiðandanum Harvey Weinstein. 

Konurnar sex, sem fjallað er um í nýjustu greininni, segja frá því að Moonves hafi áreitt þær kynferðislega eða beitt þær kynferðisofbeldi frá því á níunda áratugnum fram til ársins 2010. Sumar þeirra halda því fram að hann hafi neytt þær til að veita honum munnmök eða berað sig fyrir framan þær án þeirra samþykkis. Sumar halda því fram að hann hafi eyðilagt þeirra starfsferil þegar og ef þær synjuðu honum eða mótmæltu. 

Sjónvarpsframleiðandinn Phyllis Golden-Gottlieb og rithöfundurinn Jessica Pallingston eru á meðal þeirra kvenna sem stíga fram. Þær lýsa samskiptum sínum við Moonves á grafískan hátt.

Moonves segir í yfirlýsingu að það sem komi fram í greininni sé ekki satt. Það sé aftur á móti rétt að hann hafi stundað kynlíf með þremur af konunum sex fyrir um aldarfjórðungi, áður en hann hóf störf hjá CBS. Það hafi verið með þeirra samþykki.

„Ég hef aldrei notað stöðu mína til að koma í veg fyrir frama kvenna. Á mínum 40 ára starfsferli hef ég aldrei heyrt jafn sturlaðar ásakanir.“

mbl.is
EAE Bilalyftur
Bílalyftur allar gerðir, eigum á lager 4 tonna 2 pósta og 3 t í gólf og 1 metra ...
ANDLITSBAÐ Á KR.7500 TIL JÓLA
Gefðu andliti þinu næringu í roki og rigningu kulda eða öðru sem á því mæðir. ...
Infrarauður Saunaklefi tilboð til 15 nov 299.000
Verð 329.000 Topp klefar.Tilboð til 15 nov 299.000 Hiti frá 30- 75 gráður (því...
Hreinsa þakrennur fyrir veturinn
Hreinsa þakrennur, fyrir veturinn og tek að mér ýmis smærri verkefni. Uppl. í sí...