Sajid Javid, innanríkisráðherra Bretlands, segir að rússnesku mennirnir tveir, sem eru grunaðir um að hafa eitrað fyrir Skrípal-feðginunum, Sergei og Júlíu, verði handsamaðir og sóttir til saka yfirgefi þeir Rússland.
Javid telur hins vegar afar ólíklegt að mennirnir muni sjást aftur í Bretlandi.
Hann sagði í samtali við BBC að talið væri að mennirnir tilheyrðu rússnesku leyniþjónustunni GRU og að þeir hefðu verið að framfylgja skipunum hátt settra embættismanna í Rússlandi.
Eitrað var fyrir Sergei Skrípal, sem er fyrrverandi rússneskur njósnari, og Júlíu dóttur hans, í mars á þessu ári.
Talið er að mennirnir hafi ferðast til Bretlands frá Moskvu, höfuðborg Rússlands, 2. mars á rússneskum vegabréfum. Þeir hafi notað dulnefnin Alexander Petrov og Ruslan Boshirov.
Lögreglan segir að þeir hafi sprautað taugaeitrinu Novichok á dyrnar að heimili Skrípal tveimur dögum síðar í Salisbury. Síðar sama daga héldu mennirnir aftur til Rússlands.
Árásin leiddi til þess að Skrípal, sem er 66 ára gamall, og dóttir hans, 33 ára, voru flutt á sjúkrahús þar sem þau lágu í nokkrar vikur.
Breski innanríkisráðherrann segir að árásin hafi verið ógeðfelld.
Hann segir það augljóst að rússnesk stjórnvöld hafi staðið á bak við árásina. Þarna hafi tveir rússneskir ríkisborgarar verið sendir til Bretlands í þeim eina tilgangi að reyna að ráða Skrípal af dögum.