Michel Barnier, aðalsamningamaður ESB í viðræðum um útgöngu Breta úr sambandinu, segir að samkomulag um fyrstu skref útgöngu Breta úr sambandinu muni liggja fyrir í byrjun nóvember.
Barnier greindi frá þessu á efnahagsráðstefnu sem fram fór í Bled í Slóveníu í dag. Tíðindin féllu í kramið í fjármálageiranum en gengi pundsins styrktist um eitt prósent gagnvart Bandaríkjadollar eftir yfirlýsingu Barniers.
„Ef við erum raunsæ ættum við að komast að samkomulagi um fyrstu skref útgöngunnar, hinn eiginlega Brexit-samning, innan sex til átta vikna,“ sagði Barnier. Í síðustu viku sagði hann að hann myndi bjóða Bretum einstakan viðskiptasamning sem fæli í sér nánara samstarf við ESB en áður hefði verið í boði fyrir ríki utan sambandsins.
Markmið Breta er að ganga út Evrópusambandinu 29. mars 2019. Samningsaðilar vilja ganga frá samningsdrögum sem fyrst svo breska þingið hafi nægan tíma til að ræða niðurstöðuna þar sem álitamálin verða án efa af margvíslegum toga.