Hótar glæpadómstólnum refsiaðgerðum

John Bolton þjóðaröryggisráðgjafi Bandaríkjanna segir bandarísk stjórnvöld munu gera allt ...
John Bolton þjóðaröryggisráðgjafi Bandaríkjanna segir bandarísk stjórnvöld munu gera allt sem þau geti til að „vernda bandaríska ríkisborgara“. AFP

Bandarísk stjórnvöld hafa hótað Alþjóðaglæpadómstólnum í Haag refsiaðgerðum haldi dómstóllinn því til streitu að lögsækja Bandaríkjamenn.

BBC segir dómstólinn vera að skoða hvort lögsækja eigi bandaríska hermenn vegna meintra misþyrminga þeirra á föngum sínum í Afganistan.

John Bolton, þjóðaröryggisráðgjafi Bandaríkjanna, segir dómstólinn hins vegar vera „ólöglegan“ og hét því að bandarísk stjórnvöld mundu gera allt sem þau gætu til að „vernda bandaríska ríkisborgara“.

Bandaríkin eru í hópi tuga þjóða sem ekki hafa tekið þátt í starfi dómstólsins, sem var stofnaður árið 2002.

Bolton hefur lengi verið gagnrýnin í garð glæpadómstólsins, en reiði hans nú beinist m.a. gegn beiðni saksóknara glæpadómstólsins, Fatou Bensouda, sem hefur óskað eftir ítarlegri rannsókn á meintum stríðsglæpum í Afganistan. Myndi slík rannsókn einnig ná til glæpa sem bandarískir hermenn og starfsfólk leyniþjónustunnar kynnu að hafa framið.

Sagði Bolton hvorki afgönsk stjórnvöld, né stjórnvöld nokkurra þeirra ríkja sem ættu aðild að Rómarsáttmálanum hafa lagt fram slíka beiðni.

Ósk Palestínumanna að lögsækja Ísrael fyrir glæpadómstólnum  vegna mannréttindabrota og hertekningar á Vesturbakkanum hefur þá ekki síður vakið reiði Boltons í garð dómstólsins.

mbl.is