Þjófar sem rændu demantsskreyttu nestisboxi úr gulli sem sem var í eigu fyrrverandi konungsfjölskyldu á Indlandi nýttu það í sínum upprunalega tilgangi og geymdu í því mat, þar sem þeir fundu ekki að því kaupendur.
Nestisboxinu var stolið í síðustu viku ásamt rúbínskreyttum tebolla úr skíragulli, undirskál og teskeið að andvirði 760 milljóna króna. Munirnir, sem höfðu verið í eigu Mirs Osmans Alis Khans, síðasta konungs Hyderabad og eitt sinn ríkasta manns í heimi, eru nú komnir í leitirnar. Tveir menn voru handteknir í borginni Hyderabad vegna málsins.
Lögregla taldi að þjófarnir hefðu flúið með munina til Mumbai til að koma hlutunum í verð og það reyndist raunin. Þar sem þeir fundu ekki kaupendur héldu þeir hins vegar aftur til Hyderabad þar sem lögregla hafði uppi á þeim eftir mikla leit.
Þjófarnir tóku munina úr sýningarhvelfingu í Nizam-höll, en sverði úr eigu sömu konungsfjölskyldu var stolið af öðru safni í borginni fyrir 10 árum. Þjófarnir áttu við eftirlitsmyndavélar svo þjófnaðurinn næðist ekki á mynd en þeir skrúfuðu svo glerdyr af sýningarskápnum til að forðast skemmdir á munum.
Mununum verður nú komið aftur fyrir á Nizam-safni sem var opnað almenningi árið 2000. Stærstur hluti sýningarinnar er dýrar gjafir sem Mir Osman Ali Khan voru gefnar árið 1937. Khan réð þá yfir stærsta konungdæmi Indlands. Hann lést árið 1967, en sögur voru sagðar af auði hans. Átti Khan m.a. Jacob-demantinn sem var á stærð við egg, sem og marga aðra einstaka skartgripi.