Bandaríski flotaforinginn William McRaven, sem sagði Donald Trump Bandaríkjaforseta skömm fyrir Bandaríkin í opnu bréfi til forsetans sem birtist í dagblaðinu Washington Post í síðasta mánuði, sagði í kjölfarið af sér sem fulltrúi í háttsettri nefnd sem starfar á vegum bandaríska varnamálaráðuneytisins.
Fram kemur í frétt AFP að afsögnin hafi tekið gildi 20. ágúst en bréfið birtist 16. ágúst í dagblaðinu. Með bréfinu gagnrýndi McRaven Trump fyrir að refsa öðrum gagnrýnanda sínum, John Brennan, fyrrverandi forstjóra bandarísku leyniþjónustunnar CIA, með því að svipta hann aðgangi að trúnaðargögnum.
Sagði McRaven í bréfinu að Trump hefði með gerðum sínum valdið Bandaríkjunum skömm og niðurlægt landið á alþjóðavettvangi. Það versta væri þó að forsetinn hefði sundrað Bandaríkjamönnum sem þjóð. Varaði hann Trump við því að honum myndi ekki takast það ætlunarverk sitt að kæfa gagnrýnisraddir.