Donald Trump Bandaríkjaforseti segist vera að íhuga alvarlega beiðni Pólverja um að bandarísk herstöð verði í landinu til frambúðar.
Á blaðamannafundi með Andrzej Duda, forseta Póllands, í Hvíta húsinu sagði Trump að Pólland hafi boðist til þess að greiða bandarískum stjórnvöldum að minnsta kosti 2 milljarða dala, eða um 222 milljarða króna, til að aðstoða við kostnaðinn vegna herstöðvarinnar.
„Við erum að íhuga þetta mjög alvarlega,“ sagði Trump.
Duda grínaðist með það á blaðamannafundinum að herstöðin gæti heitið „Fort Trump“.
Hann sagði að þensla rússneska hersins, þar á meðal yfirtaka á svæðum uppreisnarmanna í Georgíu og innlimun Krímskaga, sé hluti af „stöðugum brotum á alþjóðlegum lögum.“
Hann bætti því við að mjög margt réttlætti bandaríska herstöð í Póllandi.