Ástralska matvöruverslanakeðjan Woolworth hefur fjarlægt saumnálar úr verslunum sínum tímabundið af öryggisástæðum. Hið furðulegasta mál skekur nú áströlsku þjóðina þar sem saumnálar hafa fundist í jarðarberjaöskjum í sex fylkjum og hefur málið valdið ótta hjá almenningi í landinu.
Yfirvöld í Ástralíu hafa fyrirskipað rannsókn á fundi saumnála í jarðarberjum og hafa heilbrigðisyfirvöld hvatt fólk til að skera jarðarber í sundur áður en þeirra er neytt. Þá hafa einnig komið upp nokkur tilfelli þar sem nálar fundust í eplum og banönum.
Yfirvöld hafa einnig tilkynnt að þau muni taka upp harðari refsingar vegna saumnála sem fundist hafa í ávöxtum.
Rannsókn hófst á málinu eftir að maður að nafni Joshua Gane greindi frá því á Facebook að vinur hans hefði mátt þola verulegan sársauka í meltingarfærum eftir að hafa borðað jarðarber með nál í.
Margir jarðarberjaræktendur segja að viðbrögðin við nálarfundunum séu yfirdrifin. Forsvarsmenn Woolworth segjast fyrst og fremst vera að gæta hagsmuna viðskiptavina sinna með því að taka nálarnar úr sölu.
Markaðsfræðingurinn Paul Nelson segir í samtali við BBC að Woolworth sé að einhverju leyti að sýna samfélagslega ábyrgð með því að fjarlægja nálarnar en á sama tíma sé hægt að færa rök fyrir því að keðjan vilji taka þátt í umræðunni sem fylgir uppákomunni.