Tilbúin að bera vitni fyrir dómaranefndinni
Setja bókamerki
Christine Blasey Ford, konan sem hefur sakað Brett Kavananaugh, dómaraefni Donald Trumps Bandaríkjaforseta, um kynferðislegt ofbeldi þegar þau voru á táningsaldri, segist nú vera tilbúin að bera vitni fyrir dómaranefnd bandarísku öldungadeildarinnar.
Lögfræðingur Ford hafði áður sagt nefndinni að hún myndi ekki geta komið fyrir nefndina á mánudag líkt og til hafði staðið. Í tölvupóstum sem bæði Washington Post og New York Times hafa undir höndum er ákvörðun repúblikana í dómaranefndinni varðandi dagsetninguna sögð vera gerræðisleg og þess jafnframt óskað að nýr tími verði fundinn.
Mánudagur „gengur ekki og sú krafa nefndarinnar að þetta verði að gerast þá er gerræðisleg,“ segir í bréfinu. „Áttið þið ykkur á að hún hefur fengið líflátshótanir sem hafa verið tilkynntar bandarísku alríkislögreglunni FBI og að hún og fjölskylda hennar hafa neyðst til að yfirgefa heimili sitt?“
Ford vilji bera vitni, svo framarlega sem hægt sé að fallast á skilmála sem séu sanngjarnir og tryggi öryggi hennar.
„Hún myndi þó helst af öllu vilja að full rannsókn ætti sér stað áður en hún kemur fyrir nefndina,“ segir í bréfinu.
Greint var frá því í gær að Ford væri treg til að bera vitni fyrir nefndinni fyrr en að lokinni rannsókn FBI á málinu, sem lögfræðingur hennar segir að ætti að vera hluti af almennri bakgrunnsskoðun á dómaraefninu.
Þar sem Kavanaugh neitar ásökununum og Ford hefur ekki til þessa tekist að benda á vitni að atburðinum hefur formaður dómaranefndarinnar, sem og ráðamenn í Hvíta húsinu, þrýst á hana að bera vitni sem fyrst svo hægt sé að samþykkja Kavanaugh sem hæstaréttardómara.
Fara ekki lengur fram á einangrun yfir Davíð
Áverkar bentu til manndráps
„Þetta náttúrulega endar með ósköpum“
Mest spennandi kosningar í áratugi
Sáttur við sína stöðu og finnur fyrir meðbyr
Búið að bólusetja börn alla helgina