Nokkrir látnir eftir skotárás á hersýningu

Skotárás var gerð á hersýningu í írönsku borginni Ahvaz nú ...
Skotárás var gerð á hersýningu í írönsku borginni Ahvaz nú í morgun. Kort/Google

Nokkrir létust og að minnsta kosti 20 særðust er skotárás var gerð á hersýningu í írönsku borginni Ahvaz nú í morgun.

BBC hefur eftir írönskum ríkisfjölmiðlum að árásarmennirnir hafi skotið á hersýninguna frá garði í nágrenninu og að þeir hafi verið klæddir búningum hermanna.

Eru árásarmennirnir sagðir hafa verið a.m.k. tveir og að þeir hafi skotið á almenna borgara og reynt svo að ná til herforingja sem voru á sérstökum áhorfendapöllum. AFP-fréttastofan segir konu og barn vera í hópi þeirra sem létust.

Skotárásin varði í um 10 mínútur og eru öryggissveitir hersins nú sagðar hafa náð stjórn á ástandinu. Myndir af árásarstaðnum hafa sýnt særða hermenn vera flutta á brott.

Segja íranskir ríkisfjölmiðlar að talið sé að vígasamtök íslamista standi að baki árásinni.

Íranar minnast þessa dagana upphafs stríðsins við Írak (1980-1988) með hersýningum víða um land.

Ahvaz var ein þeirra borga í Íran þar sem að kom til fjölmennra mótmæla í fyrra vegna versnandi lífsskilyrða.

mbl.is