Ræðara bjargað eftir 100 daga á sjó

Duncan Hutchison sem hugðist róa á heimasmíðuðum bát yfir Atlantshafið, frá New York til Lochinver í norðvesturhluta Skotlands, var bjargað undan ströndum Cornwall á Englandi eftir að hann lenti í vandræðum með bát sinn. Honum var bjargað um borð í flutningaskipt eftir að hafa sent út neyðarkall. The Guardian greinir frá.

Hutchison lagði af stað í hið 5.600 kílómetra ferðlag í maí á 23 feta tréárabát og hefur síðan þá safnað yfir 18 þúsund pundum til góðgerðarstofnunarinnar WaterAid.

Í færslu á Facebook-síðu Hutchison segir að hann sé eyðilagður, sérstaklega af því um tæknilegt vandamál var að ræða en ekki líkamleg vandamál eða vandamál vegna samsetningar bátsins. Hann ætlar sér þó að klára verkefnið, en þegar honum var bjargað hafði verið í 100 daga á sjó.

Í færslunni segir að hann hafi brugðist rétt við aðstæðum. Það hafi verið rétt ákvörðun hjá honum að senda út neyðarkall; fyrir hann sjálfan, bátinn og stuðningshópinn sem hefur siglt með honum. Ákvörðunin hafi hins vegar verið mjög erfið.

Strandgæslan staðfestir að Hutchison hafi tilkynnt að hann hafi átt í vandræðum með mikinn öldugang og að neyðarboð hafi í kjölfarið verið send til allra báta og skipa á svæðinu. Það var svo flutningaskip sem kom honum til bjargar og flytur hann nú aftur til New York.

• Blogga um frétt