Þjóðernisflokkur Marine Le Pen, Rassemblement national (RN) hefur fengið helming þess fjár, alls eina milljón evra, til baka sem rannsóknardómarar fóru fram á að yrðu haldlagðar í tengslum við rannsókn á hvort flokkurinn hafi dregið að sér fé úr sjóðum Evrópuþingsins.
Um er að ræða fjármuni sem flokkurinn, sem áður hét Front National, fékk úthlutað úr opinberum sjóðum.
Áfrýjunardómstóll í París úrskurðaði í dag að flokkurinn ætti rétt á að fá féð í sína vörslu en rannsóknin beinst einkum að formanni flokksins, Marine Le Pen, sem er þingmaður á Evrópuþinginu. Hún mótmælti harðlega þegar dómari ákvað að frysta greiðslur til flokksins 28. júní og sagði að þetta gæti markað endalok flokksins.
Lögmaður hennar, Rodolphe Bosselut, segir ákvörðunina fyrsta sigurinn í málinu og að hann muni áfrýja að nýju til þess að tryggja flokknum alla peningana.
Alls fékk flokkurinn 4,5 milljónir evra greiddar út í ár. RN hefur átt í fjárhagserfiðleikum. Árið 2014 þurfti flokkurinn að taka níu milljóna evra lán hjá rússneskum banka þar sem illa gekk að sannfæra franska banka um að lána flokknum. Meðal annars neituðu bankar eins og Societe Generale og HSBC að veita flokknum fyrirgreiðslu í fyrra.
Evrópuþingið fer fram á að flokkurinn endurgreiði sjö milljónir evra sem Le Pen og fleiri þingmenn Þjóðfylkingarinnar sviku út úr Evrópuþinginu. Þeirra á meðal er faðir hennar, Jean-Marie Le Pen, stofnandi flokksins.