Montserrat Caballé látin

Spænska sópransöngkonan Montserrat Caballé er látin, 85 ára að aldri. Caballé hafði þjáðst af heilsukvillum um nokkurt skeið og var lögð inn á spítala í heimaborg sinni Bercelona í september. 

BBC greinir frá.

Ferill Caballé spannaði hálfa öld en hún náði heimsfrægð árið 1965 þegar hún söng titilhlutverkið í Lucrezia Borgia í Carnegie Hall í New York. Þá söng hún á ferlinum einnig með heimsfrægum óperusöngvurum á borð við Luciano Pavarotti og Placido Domingo.  

Hún varð  líklega frægust fyrir að hafa árið 1987 flutt lagið Barcelona með Freddie Mercury sem síðar varð einkennissöngur Ólympíuleikanna í Barcelona 1992, ári eftir að Freddie Mercury lést.

Ásamt því að hafa gullfallega rödd þótti hún hafa ómótstæðilegan persónuleika og bera af hvað dramatíska túlkun varðaði.

Caballé í Simon Boccanegra í Orange í S-Frakklandi árið 1985. AFP

• Blogga um frétt