35 þúsund manns minntust Larsen

Kim Larsen á tónleikum á Íslandi árið 2016.
Kim Larsen á tónleikum á Íslandi árið 2016. mbl.is/Eggert

Um 35 þúsund manns söfnuðust saman á minningartónleikum á Ráðhústorgi í Kaupmannahöfn um tónlistarmanninn Kim Larsen, að sögn skipuleggjenda og öryggisstarfsmanna. 

Þetta kom fram í frétt danska ríkisútvarpsins.

Fjöldi fólks kom einnig saman við H.C. Andersens-götu og í Vesterbro til að fylgjast með tónleikunum á risaskjá. Þar að auki voru tónleikarnir sýndir á risaskjáum í Árósum, Álaborg og Óðinsvéum.

Fylgdust með á risaskjám

Í Árósum fylgdust um 8 þúsund manns með tónleikunum á risaskjá, um 3.500 manns sáu þá í Óðinsvéum.

„Við erum mjög ánægð með að allur þessi mannfjöldi hafi fylgst með,“ sagði Jan Lagermand Lundme, sem hafði yfirumsjón með skipulagningunni.

„Við höfum farið saman í gegnum allan tilfinningaskalann. Okkur langaði að safna Dönum saman og kveðja og um leið hylla Kim Larsen og syngja saman mörg af hans frábæru lögum,“ bætti hann við.

Fluttu mörg af bestu lögum Larsen

Caroline Henderson steig fyrst á svið og söng lagið „Som et strejf af en dråbe“. Á eftir henni komu meðal annars Magtens Korridorer, The Minds of 99 og Kwamie Liv og fluttu mörg af þekktustu lögum Larsen. Tónleikunum lauk með laginu „Om lidt“ sem stúlknakór danska ríkisútvarpsins söng og tóku allir á Ráðhústorginu undir.



mbl.is