Kim Jong-un, einræðisherra Norður-Kóreu, hefur boðið Frans páfa í heimsókn til landsins. Þetta kemur fram í yfirlýsingu frá forsetaskrifstofu nágrannaríkisins Suður-Kóreu.
Það mun verða forseti Suður-Kóreu, Moon Jae-in sem mun formlega afhenda páfa heimboðið í heimsókn sinni til Vatíkansins í næstu viku. Enginn páfi hefur heimsótt Norður-Kóreu en Jóhannesi Páli páfa II var eitt sinn boðið í heimsókn. Engin formleg tengsl eru á milli stjórnvalda í Norður-Kóreu og Páfagarðs.
Í tilkynningu frá forsetaskrifstofu Suður-Kóreu segir að í heimsókn sinni muni Moon færa páfanum skilaboð frá Kim Jong-un um að honum sé boðið í heimsókn til höfuðborgarinnar Pyongyang.
Sérfræðingar telja að boðið sé enn eitt merkið um sáttahönd Kims Jong-un en hann átti t.d. fund með Donald Trump Bandaríkjaforseta fyrr á þessu ári.