Sameinuðu þjóðirnar vilja að „gagnsæ rannsókn“ verði gerð á dauða forystumanns úr stjórnarandstöðu Venesúela sem lést er hann var í varðhaldi í landinu. Stjórnvöld í Venesúela segja að Fernando Alban hafi svipt sig lífi á meðan hann var í haldi.
„Fernando Alban var í varðhaldi á vegum ríkisins. Ríkið hafði skyldum að gegna við að tryggja öryggi hans og sæmd [...] Við viljum svo sannarlega að gagnsæ rannsókn verði gerð til að komast til botns í þeim kringumstæðum sem voru uppi er hann lést,“ sagði Ravina Shamdasani, talsmaður framkvæmdastjóra mannréttindastofnunar Sameinuðu þjóðanna, í dag.
Alban var í haldi grunaður um að hafa tekið þátt í meintri og misheppnaðri drónaárás á forsetann Nicolas Maduro í byrjun ágúst.
Ríkissaksóknari Venesúela segir að Alban hafi hent sér út um glugga á tíundu hæð höfuðstöðva leyniþjónustunnar þangað sem hann hafði verið fluttur vegna réttarhalda.
Flokkur Albans kennir ríkisstjórn Maduros um dauða hans.