Recep Tayyip Erdogan Tyrklandsforseti þrýsti í dag á stjórnvöld í Sádi-Arabíu að birta myndefni sem sýni að sádi-arabíski blaðamaðurinn Jamal Khashoggi hafi verið á lífi er hann yfirgaf sádi-arabísku ræðismannsskrifstofuna í Tyrklandi. Hét Erdogan því að Tyrkir myndu ekki „þegja“ um hin dularfullu örlög Khashoggis.
Khashoggi, sem var gagnrýninn á stjórnvöld í heimalandi sínu, kom á sádi-arabísku ræðismannsskrifstofuna í Tyrklandi 2. október til þess að verða sér úti um opinbera pappíra þannig að hann gæti gengið að eiga tyrkneska unnustu sína. Ekkert hefur spurst til hans síðan og segir tyrkneska lögreglan hann aldrei hafa komið þaðan út.
Fullyrðir tyrkneska öryggislögreglan raunar að Khashoggi hafi verið myrtur, en stjórnvöld í Sádi-Arabíu segja slíkar ásakanir ekki eiga sér neina stoð í veruleikanum. Khashoggi hafi verið á lífi er hann yfirgaf skrifstofuna, en eftirlitsmyndavélar hafi hins vegar verið bilaðar þennan dag.
AFP-fréttastofan segir Erdogan hins vegar ekki telja þær útskýringar fullnægjandi.
„Getur virkilega verið að engar eftirlitsmyndavélar séu á ræðismannsskrifstofunni, í sendiráði? Er það mögulegt að engar sádi-arabískar myndavélar hafi verið þar sem þetta atvik átti sér stað,“ hefur tyrkneska dagblaðið Hurriyet eftir forsetanum. Engir standi Sádi-Aröbum framar er kemur að eftirlitskerfum.
Erdogan hefur þó ekki gengið jafnlangt og ýmsir tyrkneskir embættismenn sem hafa látið hafa eftir sér ógnvekjandi lýsingar á meintu morði Khashoggis. Hafa þeir m.a. sagt lík hans hafa verið sundurlimað í sendiráðinu. Aðrir telja mögulegt að hann hafi verið numinn á brott, en ekki myrtur.
Tyrknesk sjónvarpsstöð birti í gær myndbandsupptökur úr eftirlitsmyndavélum sem sagðar eru tengjast hvarfi Khashoggis.
Upptökurnar sem TRT-sjónvarpsstöðin birti sýnir bíla aka upp að sendiráðinu, m.a. svarta sendiferðabíla, sem taldir eru tengjast rannsókninni. Þá sést einnig hópur sádi-arabískra karla koma til landsins um Istanbúl-flugvöll, þeir skrá sig síðan inn á hótel og sjást svo aftur yfirgefa landið með sádi-arabískri leiguflugvél sem beið þeirra á flugbrautinni.
Þá segir tyrkneska dagblaðið Sabah að það hafi borið kennsl á 15 liðsmenn leyniþjónustunnar sem þátt hafi átt í hvarfi Khashoggis og er tyrkneska öryggislögreglan nú sögð vera að skoða 15 manna hóp Sádi-Araba sem voru á ræðismannsskrifstofunni á sama tíma og Khashoggi og komið höfðu til Istanbúl með tveimur einkaþotum fyrr þann sama dag.
Tyrkneskir fjölmiðlar hafa kallað 15 menninganna „aftökuteymið“ og er einn mannanna sagður vera réttarmeinafræðingur.
BBC segir einn mannanna um tíma hafa starfað við sendiráð Sádi-Arabíu í London, en tyrkneska lögreglan vinnur nú að því að skoða upptökur úr 150 eftirlitsmyndavélum í tengslum við ransókn sína.