Að minnsta kosti tveir létust er flóð hrifu nokkra bíla með sér í kjölfar mikilla rigninga í suðurhluta Frakklands í nótt.
Óveðrið sem nú gengur yfir Miðjarðarhafið og nágrenni varð að minnsta kosti tíu að bana á spænsku eyjunni Majorka og varð til þess að brú hrundi á ítölsku eyjunni Sardiníu.
Tvö lík hafa fundist í suðurhluta Frakklands. Fundust þau í bíl sem hafði farið á hvolf í flóðum í nágrenni bæjarins Sainte-Maxime.
Talið er að bíllinn hafi verið meðal nokkurra sem vatnsflaumurinn hreif með sér er áin Garonnette flæddi yfir bakka sína. Í nótt mældist úrkoma á svæðinu um 200 millimetrar. Sextán manneskjum var bjargað.
Á Majorka leita björgunarsveitir enn fimm ára gamals drengs og tveggja þýskra ferðamanna sem saknað er í kjölfar flóðanna sem þar urðu.