36 manns hið minnsta létust í aurskriðu sem féll í kjölfar úrhellisrigningar í austurhluta Úganda. Óttast er að tala látinna eigi eftir að hækka, en björgunarsveitir eru nú á leið á staðinn, að því er BBC greinir frá.
Á í bænum Bukalasi, sem er í Elgon fjalllendinu í Bududa, flæddi yfir bakka sína og straumur leðju og vatns bar heilu þorpin á brott. Myndir sem birtar hafa verið sýna íbúa ná látnu fólki úr leðjunni og bera á brott.
Svæðið er fjalllent og með eldfjallajarðveg sem hentar vel fyrir landbúnaðarrækt. Það er þó einnig þéttbýlt og álag því mikið á ræktarland.
Að sögn Rauða krossins í Úganda, þá hafa 36 lík fundist. Dagblaðið Daily Monitor hefur hins vegar eftir yfirvöldum í héraðinu að 40 hafi fundist látnir.
Uganda landslide near Mount Elgon kills more than 30 https://t.co/k5vZ2DD2bL pic.twitter.com/6cYfiAIJsK
— BBC News Africa (@BBCAfrica) October 12, 2018
„Þegar vatnið flæddi niður þá tók það fjölda stórra steina með sér sem eyðilögðu heimili fólks,“ sagði Irene Nakasiita, talsmaður Rauða krossins í samtali við AFP-fréttastofuna.
Aurskriða sem féll einnig í Bududa héraði árið 2010 varð rúmlega 300 manns að bana.
At least 34 people were killed after mudslides and floods engulfed homes in eastern Uganda https://t.co/Vln8lRApPy pic.twitter.com/KKAi9o3T4l
— CNN International (@cnni) October 12, 2018