Senda 800 hermenn að landamærunum
Setja bókamerki
Donald Trump Bandaríkjaforseti undirbýr að senda að minnsta kosti 800 hermenn að suðurlandamærum Bandaríkjanna að Mexíkó.
Hermennirnir eiga að koma í veg fyrir að hópur hælisleitenda, sem er á leið að landamærum Bandaríkjanna að Mexíkó, komist yfir þau. Talið er að um sjö þúsund manns tilheyri hópnum, sem lagði upphaflega af stað frá Hondúras, en á leiðinni til Bandaríkjanna hafa fjölmargir bæst í hann.
Trump hefur sagt að neyðarástand ríki í Bandaríkjunum vegna ágangs hælisleitenda sem reyni að komast yfir landamærin. „Ég mun senda herinn í þetta neyðarástand. Þau verða stöðvuð!“ sagði Trump í twitterfærslu á þriðjudag.
Hermennirnir munu bætast við hóp um 2.000 þjóðvarðliða sem sinna landamæraeftirliti á svæðinu. Talið er að James Mattis varnarmálaráðherra muni samþykkja herflutninginn síðar í dag.
Trump hefur gert ferð fólksins að landamærunum að útgangspunkti í kosningabaráttunni fyrir komandi þingkosningar í þarnæstu viku. Svo virðist sem forsetinn ætli að nota andúð stuðningsmanna sinna á innflytjendum til þess að tryggja stöðu repúblikana í báðum þingdeildum. Trump hefur meðal annars hótað því að loka landamærunum alfarið með hervaldi og að hætta fjárhagslegum stuðningi við Hondúras, El Salvador og Gvatemala.
Árshátíð ríkislögreglustjóra haldin í Tékklandi
Handteknir eftir myndatöku í Vesturbæjarlaug
Sex hafa greinst með listeríu
Æskuvinur Íslendings myrtur í Noregi
Eyjafjarðarbraut lokað vegna alvarlegs umferðarslyss
Telur forsendur fyrir vaxtalækkun
Tveir í bílnum sem lenti utan vegar
Skemmtiferðaskip hætt komið nærri Viðey