Erlent | mbl | 29.10.2018 | 19:55 | Uppfært 30.10.2018 5:40

Þúsundir hermanna sendar að landamærunum

Hælisleitendur fara hér yfir Suchiate-ána frá Gvatemala til Ciudad Hidalgo í Mexíkó eftir að öryggishlið á brú sem skilur löndin að var eflt. AFP

Þúsundir bandarískra hermanna kunna að vera sendar að landamærum Bandaríkjanna og Mexíkó til að hindra hóp hælisleitenda sem er á leið í gegnum Mexíkó að komast yfir til Bandaríkjanna. Reuters-fréttastofan hefur þetta eftir heimildamanni sem segir fjöldann mun meiri en þá 800-1.000 hermenn sem hingað til hefur verið talað um.

Reuters segir bandaríska varnarmálaráðuneytið Pentagon neita að tjá sig um hversu fjölmennt herlið verði sent á vettvang. Ráðuneytið segir undirbúning aðgerða enn í gangi, en slíkar aðgerðir eru taldar geta haft áhrif á þingkosningar sem fram fara í Bandaríkjunum síðar í mánuðinum.

Donald Trump Bandaríkjaforseti hefur verið ötull að tjá sig um hælisleitendahópinn og hefur m.a. sagt á Twitter að herinn muni bíða þeirra við landamærin, en með yfirlýsingum sínum gefur forsetinn í skyn mun virkari þátttöku hersins í aðgerðunum en varnarmálaráðuneytið hefur til þessa viljað gefa til kynna.

Many Gang Members and some very bad people are mixed into the Caravan heading to our Southern Border. Please go back, you will not be admitted into the United States unless you go through the legal process. This is an invasion of our Country and our Military is waiting for you!
— Donald J. Trump (@realDonaldTrump) October 29, 2018

„Fjöldi liðsmanna glæpagengja og sumt verulega vont fólk er meðal þeirra sem taka þátt í göngunni að landamærum okkar í suðri,“ sagði Trump á Twitter.

„Vinsamlegast snúið við. Ykkur verður ekki hleypt inn til Bandaríkjanna nema þið farið lagalegu leiðina. Þetta er innrás í land okkar og her okkar bíður eftir ykkur!“ bætti forsetinn við.

Hælisleitendur frá Hondúras eru hér á ferð í Oaxaca-fylki í Mexíkó á leið sinni til Bandaríkjanna. AFP

Bandarískir ráðamenn sögðu Reuters í síðustu viku að herinn muni ekki taka virkan þátt í að koma í veg fyrir að fólkið komist til Bandaríkjanna, þess í stað verði sendir verkfræðingar, flugmenn og annað starfsfólk sem getur aðstoðað við að halda mannfjöldanum Bandaríkjamegin landamæranna í skefjum.

Jim Mattis varnarámálaráðherra heimilaði í síðustu viku notkun hergagna og að hersveitir verði sendar að landamærunum.

New York Times greindi frá því nú í kvöld að 5.200 hermenn verði sendir að landamærunum, en áður hafði Reuters eftir heimildamönnum að til standi að senda hersveitir á staðinn strax á morgun og að þær verði hafðar við landamærin fram undir miðjan desember. Vel komi þá til greina að framlengja viðveru hersveitanna reynist þess þörf.

2.000 þjóðvarðliðar eru þegar við gæslu á landamærunum og hafa verið þar frá því í apríl á þessu ári að beiðni forsetans.

Fréttin hefur verið uppfærð.