Brasilía ætlar að flytja sendiráð sitt í Ísrael til Jerúsalem. Þetta sagði Jair Bolsonaro, nýkjörinn forseti Brasilíu. Þar með verður landið það stærsta á eftir Bandaríkjunum til að taka þessa umdeildu ákvörðun.
„Eins og kom fram í kosningaherferð okkar ætlum við að flytja brasilíska sendiráðið frá Tel-Aviv til Jerúsalem. Ísrael er fullvalda ríki og við ætlum að virða það,“ tísti Bolsonaro á Twitter.
Búast má við að ákvörðunin falli afar illa í kramið hjá Palestínumönnum og stórum hluta heimsins.
Bandaríkjastjórn opnaði sendiráð sitt í Jerúsalem fyrr á árinu og viðurkenndi um leið borgina sem höfuðborg Ísraels.