Jarðskjálfti að stærðinni 5,9 varð skammt undan japönsku eyjunni Hokkaido í kvöld. Skjálftinn mældist á um 8 km dýpi og var um 107 km norðaustur af Shibetsu.
Bandaríska jarðvísindastofnunin segir að litlar líkur séu á því að skjálftinn hafi valdið manntjóni eða eyðileggingu.
Í september varð skjálfti að stærðinni 6,6 þar sem allt lék á reiðiskjálfi í Hokkaido með þeim afleiðingum að skriður féllu, hús jöfnuðust við jörðu og yfir 40 létust.
Flekaskil við Japan samanstanda af nokkrum smáflekum sem landið situr á. Þar takast á Kyrrahafsfleki og Evrasíufleki, tveir af meginflekum jarðarinnar.