Maður sem lifði af skotárásina í Las Vegas í október fyrra lét lífið í skotárásinni í borginni Thousand Oaks á miðvikudagskvöld.
Eins og í Las Vegas voru kántrý-tónleikar á veitingastaðnum þar sem skotárásin varð á miðvikudagskvöld og voru þó nokkrir sem komust lífs af í Las Vegas viðstaddir tónleikana í gær.
Telemachus Orfanos var einn þeirra en hann er meðal þeirra 12 sem létu lífið í árásinni. „Sonur minn var í Las Vegas ásamt vinum sínum en hann skilaði sér heim. Í gær kom hann ekki heim,“ sagði móðir hans í samtali við ABC-fréttastofuna í gær. Orfanos var 27 ára.
„Það er einstaklega kaldhæðnislegt að hafa lifað af mannskæðustu skotárás Bandaríkjanna í áratugi en vera svo skotinn til bana í heimabænum sínum,“ segir faðir hans í samtali við Ventura County Star. Stephen Paddock skaut 58 til bana og særði 851 í skotárásinni í Las Vegas október í fyrra.
Árásarmaðurinn sem lét til skarar skríða á miðvikudagskvöld hét Ian David Long. Hann var 28 ára fyrrverandi sjóliði og þjáðist mögulega af áfallastreituröskun, en hann var fórnarlamb árásar á bar í nágrenninu árið 2015. Long fannst látinn inni á veitingastaðnum og telur lögregla hann hafa tekið eigið líf.