Segir af sér vegna samnings May

Jon Johnson.
Jon Johnson. AFP

Jo Johnson, ráðherra í samgönguráðuneyti Bretlands og bróðir Boris Johnson fyrrverandi utanríkisráðherra landsins, hefur sagt af sér embætti í mótmælaskyni við það með hvaða hætti breska ríkisstjórnin undir Theresu May forsætisráðherra hefur haldið á viðræðum við Evrópusambandið um útgöngu Breta úr sambandinu 29. mars.

Haft er eftir Johnson á fréttavef breska dagblaðsins Daily Telegraph í dag að fyrirhugaður samningur um útgöngu Bretlands væri hræðileg mistök sem fæli í sér klúður af hálfu breskra stjórnvalda sem væri á við það hvernig þau hefði haldið á Súez-deilunni um miðja síðustu öld og myndi gera Breta að undirlægjum Evrópusambandsins.

Fram kemur í yfirlýsingu frá Johnson, sem studdi áframhaldandi veru í Evrópusambandinu fyrir þjóðaratkvæðið í Bretlandi árið 2016 þar sem meirihluti kjósenda ákvað að segja skilið við sambandið, að skilmálar fyrirhugaðs samnings væru „algerlega óásættanlegir“ fyrir „stolt lýðræðisríki“ eins og Bretland. Samningurinn myndi þýða að Bretland færi formlega úr Evrópusambandinu en yrði áfram að fylgja reglum sambandsins.

Kallar Johnson eftir nýrri þjóðaratkvæðagreiðslu um það hvort segja eigi skilið við Evrópusambandið á grundvelli samnings May eða án hans.

mbl.is
Fleira áhugavert
Fleira áhugavert