Sex eru slasaðir eftir að farþegaþota nauðlenti skömmu eftir flugtak frá Cheddi Jagan-alþjóðaflugvellinum í Gvæjönu. Þotan, sem var á leið til Toronto í Kanada undir merkjum Fly Jamaica-flugfélagsins, skall í jörðina um klukkan tvö í nótt að staðartíma, eða um klukkan sex í morgun að íslenskum tíma.
Þotan er af gerðinni Boeing 757 og um borð voru 126 manns, þar á meðal tvö ungabörn. Þeir sem slösuðust voru fluttir á sjúkrahús og eru áverkar þeirra ekki taldir lífshættulegir, samkvæmt umfjöllun BBC.