Brúðgumi nokkur á Indlandi lét skotárás á leið í brúðkaup sitt ekki stöðva sig frá því að fara með brúðarheitin. Atburðurinn átti sér stað í Delhi, höfuðborg Indlands, og fékk brúðguminn byssukúlu í sig. Eftir tvo tíma á spítala sneri hann aftur í brúðkaupsveisluna og athöfnin hélt áfram, þrátt fyrir að byssukúlan væri enn föst bak við herðablaðið á honum.
BBC segir lögreglu í borginni nú leita tveggja manna sem grunaðir eru um að hafa skotið á fylgdarlið brúðgumans á mánudagskvöld.
Indian groom gets shot on wedding day and still marries https://t.co/t2Nn7Uv8Qw
— BBC News (World) (@BBCWorld) November 21, 2018
Þetta er ekki fyrsta atvikið þar sem skotum er hleypt af í tengslum við indversk brúðkaup og létu brúðgumar raunar lífið í slíkum árásum í apríl á þessu ári og árið 2016.
Segja vitni árásarmennina hafa komið á mótorhjóli. Þeir eru svo sagðir hafa klifrað upp í hestvagninn sem flutti brúðgumann og segir lögregla það benda til þess að ekki hafi verið um handahófskennda árás að ræða. Flúðu þeir síðan í ringulreiðinni sem fylgdi í kjölfar árásarinnar.
Brúðguminn fullyrðir að árásarmennirnir hafi ætlað að drepa hann.
Lögregluforinginn Vijay Kumar segir bróður brúðgumans hafa farið með hann á sjúkrahús til aðhlynningar. Þar náðu læknar að stöðva blæðinguna, en gátu ekki fjarlægt byssukúluna án umfangsmikillar aðgerðar. Brúðguminn hélt að því loknu í brúðkaupið og fór með brúðarheitin, en sneri svo aftur á spítalann fyrir aðgerðina.