Fjórir Finnar eru í haldi malasísku lögreglunnar en þeir eru sakaðir um að hafa dreift kristilegum bæklingum á eyjunni Langkawi. Þeir eiga yfir höfði sér allt að fimm ára fangelsisdóm verði þeir fundnir sekir.
Trúarbrögð eru afar viðkvæmt og um leið eldfimt málefni í Malasíu en rúmlega 60% þjóðarinnar eru íslamstrúar. Aukin völd öfgasinna hafa valdið því að dregið hefur úr umburðarlyndi gagnvart öðrum trúarbrögðum og þeim sem eru hógværari í trú sinni.
Um er að ræða tvær konur og tvo karla en þau voru handtekin í gær eftir ítrekaðar kvartanir frá fólki að sögn lögreglu.
Finnarnir fjórir, sem eru á aldrinum 27-60 ára, voru handteknir á hóteli á eyjunni og hald lagt á penna, stílabók og tösku þeirra. Þeir eru sakaðir um að hafa brotið lög sem banna dreifingu trúarrita. Refsingar við slíku broti eru tveggja til fimm ára fangelsi.