Tólftu og síðustu skákinni í heimsmeistaraeinvígi Magnus Carlsen og Fabiano Caruana lauk með jafntefli á sjöunda tímanum í kvöld. Carlsen bauð Caruana jafntefli eftir þriggja tíma skák, þrátt fyrir að vera með töluvert meiri tíma á klukkunni og segir Guardian þá ákvörðun hans hafa komið töluvert á óvart.
Hefur þar með öllum skákum einvígisins lokið með jafntefli og er það í fyrsta skipti í 132 ára sögu heimsmeistaraeinvígisins í skák sem það gerist.
Úrslitin einvígisins munu því ráðast í bráðabana sem fer fram næsta miðvikudag. Þar verða leiknar fjórar atskákir með 25 mínútna umhugsunartíma, auk þess að tíu sekúndur bætast við fyrir hvern leik.