Bandarískir saksóknarar segja að Paul Manafort, fyrrverandi kosningastjóri Donalds Trumps Bandaríkjaforseta, hafi brotið samkomulag sem hann gerði við saksóknara með því að ljúga að bandarísku alríkislögreglunni (FBI).
Í ágúst var Manafort dæmdur fyrir fjársvik í tengslum við störf sín sem pólitískur ráðgjafi í Úkraínu. Embætti sérstaks saksóknara sem rannsakar meint afskipti Rússa að forsetakosningunum í Bandaríkjunum 2016 segir að með því að brjóta gegn samkomulaginu sé engin ástæða til þess að fresta refsingu. Lögmenn Manafort segja aftur á móti að þeir telji að upplýsingarnar sem hann hafi lagt fram séu trúverðugar.
Manafort var sakfelldur fyrir skattsvik, bankasvik og fyrir að hafa ekki greint frá innistæðum hjá erlendum bönkum í kjölfar samkomulags sem hann gerði við Robert Mueller, sérstakan saksóknara í málinu.
Bandaríska forsetaembættið heldur því fram að samkomulagið komi forseta landsins, Donald Trump, nákvæmlega ekkert við.
Í september samþykkti Manafort samkomulag í tengslum við ákæru um samsæri í stað þess að vera samstarfsfús við rannsókn Muellers. En samkvæmt dómsskjölum sem lögð voru fram í gær segir Mueller að eftir að Manafort skrifaði undir samkomulagið hafi hann brotið alríkislög með því að ljúga að FBI og sérstökum saksóknara. Ekki kemur fram hverju Manafort laug, segir í frétt BBC.