Mike Pompeo, utanríkisráðherra Bandaríkjanna, segir ekkert hafa komið fram sem sýni fram á að Mohammed Bin Salman, krónprins Sádi-Arabíu, hafi fyrirskipað morðið á blaðamanninum Jamal Khashoggi. AFP-fréttastofan greinir frá.
„Ég tel mig hafa lesið og farið yfir öll gögn sem leyniþjónustan hefur undir höndum vegna málsins. Ég hef lesið allt,“ sagði hann við blaðamenn eftir lokaðan fund með þingmönnum fyrr í dag.
„Það er ekkert sem tengir krónprinsinn beint við morðið á Jamal Khashoggi,“ sagði hann jafnframt.
Donald Trump, forseti Bandaríkjanna, hefur áður sagt að leyniþjónustan hafi ekki getað sýnt fram á að krónprinsinn hafi fyrirskipað morðið, en embættismenn hafa tjáð bandarískum fjölmiðlum að slík aðgerð og morðið á Khashoggi hafi þurft að fá samþykki krónprinsins.
Þá sagðist Trump efast um að það yrði nokkurn tímann hægt að slá því föstu að krónprinsinn hefði gert það, en hann hefur ítrekað mikilvægi Sádi-Arabíu fyrir Bandaríkin að undanförnu.