Vladimír Pútín Rússlandsforseti sakar Petro Porósjenkó, forseta Úkraínu, um að hafa sviðsett átök úkraínskra herskipa við Rússa við Krímskaga til þess að auka vinsældir sínar fyrir forsetakosningar í Úkraínu á næsta ári. BBC greinir frá.
Rússneska leyniþjónustan FSB hóf skothríð á tvö úkraínsk herskip og hertók þau á sunnudag. Nokkrir úkraínskir hermenn eru sagðir hafa særst í árásinni. Í kjölfarið samþykkti úkraínska þingið að setja á herlög í landinu til þrjátíu daga.
Pútín segir Porósjenkó viljandi hafa aukið spennuna á milli landanna með atvikinu. Porósjenkó hefur sjálfur sagt að Úkraína eigi á hættu að lenda í stríði við Rússa.