Öldungadeild Bandaríkjaþings hefur samþykkt að leggja fram tillögu um að Bandaríkin hætti stuðningi við hersveitir Sádi-Araba í Jemen. Gengur þetta gegn skoðunum Bandaríkjaforseta og ráðherra.
Átök hafa geisað árum saman í Jemen á milli ríkisstjórnarinnar sem nýtur stuðnings Sádi-Araba, og húta sem njóta stuðnings klerkastjórnarinnar í Íran og hafa náð stórum hluta Jemen á sitt vald, meðal annars höfuðborginni Sanaa. Sádi-Arabía og fleiri arabaríki hafa gert loftárásir á yfirráðasvæði uppreisnarmannanna og notið stuðnings stjórnvalda í Bandaríkjunum, Bretlandi og Frakklandi.
Allt að 85 þúsund börn yngri en fimm ára hafa soltið til bana eða dáið úr farsóttum í Jemen á síðustu þremur árum. Óttast er að hungursneyð herji á 14 milljónir Jemena ef ekkert verður að gert. Íbúar landsins eru 28 milljónir talsins og er því helmingur þjóðarinnar í bráðri lífshættu. Þetta er meðal þess sem kemur fram í nýjum upplýsingum frá mannúðarsamtökunum Save the Children.
Repúblikanar eru með 53 sæti í öldungadeildinni en demókratar 47.
Tillagan var samþykkt með 63 atkvæðum gegn 37 og þykir áfall fyrir Donald Trump sem hefur verið talsmaður þess að Bandaríkin styddu hersveitir Sádi-Arabaíu í Jemen. Bæði utanríkis- og varnarmálaráðherrar Bandaríkjanna, Mike Pompeo og Jim Mattis, hvöttu þingmenn í öldungadeildinni til þess að greiða atkvæði gegn tillögunni en atkvæðagreiðslan kemur í kjölfar morðsins á blaðamanninum Jamal Khashoggi á ræðismannsskrifstofu Sádi-Arabíu í Istanbul. Khashoggi var búsettur í Bandaríkjunum en var myrtur þegar hann kom á ræðismannsskrifstofuna 2. október.
Tengsl Bandaríkjanna og Sádi-Arabíu voru rædd á fundi í öldungadeildinni í gær og þar kom fram hörð gagnrýni á forstjóra bandarísku leyniþjónustunnar (CIA), Ginu Haspel. Hún á að hafa hlustað á upptökur af morðinu og rannsakað gögn málsins. Hún var ekki viðstödd umræðurnar í gær og sagði einn þingmaður að fjarvera hennar jafngilti því að hún væri að hylma yfir með morðingjum.