Heimsókn Kim stendur enn til

Enn er mögulegt að Kim Jong-un, einræðisherra Norður-Kóreu, heimsæki nágranna sína í suðri í fyrsta sinn á næstu vikum að því er forseti Suður-Kóreu, Moon Jae-in, segir. Forsetinn segir að ef af heimsókninni verði yrði það stórt skref í átt að vinsamlegri samskiptum þjóðanna tveggja sem og útrýmingu kjarnavopna á Kóreuskaga.

Moon og Kim hafa hist þrisvar í ár og nú er vonast til þess að Kim muni heimsækja Seoul í fyrsta skipti áður en árið verður úti. Hins vegar hefur sú von dofnað í kjölfar þess að afvopnunarviðræðum hefur verið frestað. „Það er von til þess að Kim Jong-un formaður heimsæki Seoul á þessu ári en það eru aðrir hlutir mikilvægari en tímasetningin,“ sagði Moon við blaðamenn í Nýja-Sjálandi þar sem hann er nú í heimsókn. Moon segir ekkert atriði að heimsóknin verði á þessu ári, hún geti allt eins átt sér stað á því næsta. Hann segir að heimsóknin, hvenær sem hún verði, muni alveg örugglega hraða áformum um afnám kjarnavopna. 

mbl.is
Fleira áhugavert
Fleira áhugavert