Framtíð Jemen rædd í Svíþjóð

Viðræður milli stríðandi fylkinga í Jemen hófust í Svíþjóð í dag. Sameinuðu þjóðirnar segja mikið í húfi en staðan sé tvísýn.

Bæði ríkisstjórn Jemen sem og uppreisnarmenn segja kröfur erkifjendanna óraunhæfar en stríð hefur geisað í Jemen í tæp fjögur ár.

Ekki er rætt um lausn á átökunum sem hófust með upp­reisn húta sem njóta stuðnings klerka­stjórn­ar­inn­ar í Íran. Hútar hafa náð stór­um hluta Jem­ens á sitt vald, meðal ann­ars höfuðborg­inni Sanaa. Sádi-Ar­ab­ía og fleiri ar­ab­a­ríki styðja ríkisstjórn Abedrabbo Mansour Hadi og hafa gert loft­árás­ir á yf­ir­ráðasvæði upp­reisn­ar­mann­anna og notið stuðnings stjórn­valda í Banda­ríkj­un­um, Bretlandi og Frakklandi.

Staðan í Jemen er skelfileg og telja Sameinuðu þjóðirnar að hvergi í heiminum sé neyðin jafn mikil en óttast er að hungursneyð blasi við 14 milljónum Jemena. 

Undirbúningur viðræðanna hefur tekið marga mánuði og sendu SÞ meðal annars sérstaka sendinefnd til Sanaa til þess að fylgja sendinefnd uppreisnarmanna til Svíþjóðar. Gert er ráð fyrir að viðræðurnar taki viku. 

Martin Griffiths, sérlegur sendifulltrúi SÞ í málefnum Jemen, segir stöðuna tvísýna og viðræðurnar veiti einstakan möguleika á að koma á friði í Jemen. Viðræðurnar eru þær fyrstu í tvö ár til þess að reyna að koma á friði í Jemen.

Yfirmaður stjórnmálaráðs húta hótaði í gær að loka flugvellinum í höfuðborg Jemen fyrir komum flugvéla SÞ en alþjóðaflugvöllurinn í Sanaa hefur verið meira og minna lokaður í nokkur ár. Sádi-Arabar hafa gert ítrekaðar loftárásir á flugvöllinn en sveitir Sáda ræður yfir lofthelgi Jemen.

mbl.is