Maður á þrítugsaldri hefur verið ákærður fyrir morð á ungri breskri konu sem var á bakpokaferðalagi um Nýja-Sjáland. Lík hennar hefur ekki fundist þrátt fyrir umfangsmikla leit.
Ekkert hefur spurst til hinnar 22 ára gömlu Grace Millane síðan hún sást ganga inn á hótel í fylgd með karlmanni í borginni Auckland. Þrátt fyrir það eru lögregluyfirvöld viss um að hún sé látin.
Ákvörðun um að ákæra manninn fyrir morðið á Grace þrátt fyrir að lík hennar hafi ekki fundist var tekin eftir að hann hafði verið yfirheyrður ítarlega.
„Grace er ekki á lífi. Við vitum ekki enn hvar hún er en við erum ákveðin í því að finna hana og koma henni til fjölskyldu sinnar,“ sagði yfirrannsóknarlögregluþjónninn Scott Beard við fjölmiðla og vísaði til þeirra sönnunargagna sem rannsókn málsins hefur leitt í ljós.
Millane var í bakpokaferðalagi eftir að hafa útskrifast úr háskóla og hafði verið í daglegu sambandi við fjölskyldu sína þangað til hún hvarf. Faðir hennar kom til Nýja-Sjálands í gær og biðlaði til almennings um aðstoð og upplýsingar í tilfinningaríku ávarpi. Hann sagði dóttur sína hafa verið glaða og mannblendna manneskju sem hafi verið í nánu sambandi við fjölskyldu sína.
Í frétt BBC um málið segir að Grace hafi verið búin að ferðast einsömul um Nýja-Sjáland í tvær vikur eftir að hafa komið úr sex vikna hópferð um Suður-Ameríku. Dvöl Grace á hóteli hennar í Auckland átti að endast til 8. desember.
Þar segir einnig að ýmsir persónulegir munir Grace séu týndir þar með talið vegabréf hennar, hálsmen og bleikt úr.