Marina Butina, rússneska konan sem bandarísk yfirvöld handtóku í sumar og ákærðu fyrir að ganga erinda rússneskra stjórnvalda, játaði sig seka er hún var leidd fyrir dómara í dag.
Butina er sögð hafa reynt að koma sér upp tengslum innan stjórnmálahreyfinga og hagsmunahópa í Bandaríkjunum samkvæmt fyrirskipunum háttsetts embættismanns í Rússlandi og nýta þau tengsl í þágu Rússlands. Gekk hún í NRA, samtök byssueigenda í Bandaríkjunum, árið 2012 með það fyrir augum að ná fram þessu markmiði.
Lýsti Butina sig seka um samsæri fyrir dómara í Washington í dag. Upphaflega neitaði hún ákærunum, en greint var frá því fyrr í þessum mánuði að hún hefði fallist á að vera samstarfsfús við bandarísk yfirvöld.
Segir BBC saksóknara búast við að upplýsingarnar sem Butina veiti þeim muni veita innsýn í tilraunir rússneskra ráðamanna til að hafa áhrif á pólitík í Bandaríkjunum.
Reuters-fréttaveitan hefur eftir Robert Driscoll, lögfræðingi Butina, að reikna megi með að hún eigi um sex mánaða fangelsisdóm yfir höfði sér.
Ákæran á hendur Butina er ekki hluti af rannsókn Roberts Mueller, sérstaks saksóknara, á afskiptum Rússa af forsetakosningunum í Bandaríkjunum árið 2016.